Síðastliðna nótt var brotist inn í vinnuskúr heima hjá Ívari Pétri Hannessyni. Þaðan var stolið ýmsum tækjum og búnaði. Það sorglegasta við innbrotið var að skólatösku sjö ára sonar Ívars var stolið en í henni var Topii-samskiptatölva sem er drengnum nauðsynleg í dagsins önn. Sonur Ívars er með sjaldgæfan erfðasjúkdóm og er einhverfur.
Tölvan var í svartri tautösku. Hún lítur út eins og venjuleg spjaldtölva fyrir utan að neðst á henni er festur hátalari og að ofan er handfang.
„Þessi spjaldtölva er röddin hans og hann er að læra á hana í skólanum,“ segir Ívar í Facebook-færslu um málið. Hann vonast eftir að fá tölvuna til baka og heitir fundarlaunum þeim sem getur vísað á hana. Ennfremur bendir hann á að ef sá sem framdi innbrotið skilar tölvunni þá verða engir eftirmálar.
Ívar segir í samtali við DV að hann skilji son sinn í öllum samskiptum og þeir bjargi sér á táknmáli. En til lengdar og í samskiptum í skóla sé bagalegt að vera án samskiptatölvunnar.
Þeir sem hafa upplýsingar um málið geta haft samband við Ívar í skilaboðum á Facebook-síðu hans.
