Um klukkan 10:30 í gærmorgun var framið innbrot í verslunina Lóla Flórens að Garðastræti 6 í Reykjavík. Í versluninni, þar sem m.a. eru seld föt og munir í „vintage“ stíl, er einnig rekið kaffihús og boðið upp á t.d. myndlistarsýningar.

Eigendur verslunarinnar hafa lagt sig fram við að nýta hana til að stuðla að góðri hverfisstemmningu. Í sama húsnæði var lengi rekin verslun á vegum Hjálpræðishersins.

DV ræddi við Írís Ann Sigurðardóttur, sem er ein eigenda verslunarinnar. Hún segir að af öryggiskerfi verslunarinnar megi ráða hvenær innbrotið hafi verið framið. Innbrotið var framið tæplega hálfri klukkustund áður en verslunin var opnuð í gær.

Íris segir að þjófurinn hafi sparkað upp útidyrahurð verslunarinnar og tekið sjóðskassann með sér. Hún var ekki tilbúin að greina frá því hversu mikið af fé var í kassanum en sagði að tjónið fælist ekki síður í þjófnaðinum á kassanum sjálfum.

Að sögn Írisar voru ekki öryggismyndavélar í versluninni en hins vegar hafi nú verið ákveðið að setja þær upp.

Þetta er ekki í fyrsta sinn sem brotist er inn í verslunina en brotist var inn fyrir tæplega fjórum mánuðum. Í fyrra innbrotinu var farið nákvæmlega eins að. Íris telur því mjög líklegt að um sé að ræða sömu aðila. Hún telur víst að viðkomandi hafi kannað aðstæður í versluninni á opnunartíma í ljósi þess hversu skamman tíma innbrotið tók.

Lóla Flórens er ekki stórt fyrirtæki og að sögn Írisar er verslunin fyrst og fremst rekin af ástríðu. Þess vegna segir hún að henni líði eins og um sé að ræða „innbrot á sálina.“

Íris sagði fyrst frá innbrotinu á Facebook-síðu sinni og hvetur þar eigendur annarra fyrirtækja í nágrenninu til að skilja sjóðskassa sína eftir tóma og opna til að lágmarka tjón.