Hrap út um sjúkrahúsglugga, hjartaáfall, hrap niður fjallshlíð, hrap niður stiga og sjálfsvíg. Þetta eru bara nokkrar af þeim dánarorsökum sem hafa verið gefnar upp fyrir rúmlega 20 rússneska olígarka sem hafa látist síðasta árið. Við þetta má bæta dauðsföllum háttsettra herforingja.

Flestir olígarkanna lifðu í velmegun og voru með gott aðgengi að heilbrigðisþjónustu  og lífvörslu. Þetta eykur einmitt á undrun margra á af hverju þeir dóu við dularfullar kringumstæður.

Margir hinna látnu tengdust Vladímír Pútín, Rússlandsforseta, eða innsta hring hans og sumir höfðu starfað í Kreml. Sumir höfðu verið gagnrýnir á innrásina í Úkraínu.

„Eitt dauðsfall öðru hvoru á þessu stigi samfélagsins er kannski ekki svo undarlegt en þegar þau eru mörg, þá byrjar þetta að lykta undarlega. Þetta er dularfullt. Þetta eru milljarðamæringar og þeir eru með lífverði og aðra sem gæta þeirra,“ sagði Jørn Holm-Hansen, sérfræðingur í málefnum Rússlands, í samtali við Dagbladet.

Margir telja að dauðsföllin megi rekja til fyrirmæla frá Pútín og hans fólki um að viðkomandi skyldu myrtir. Einn þeirra er Bill Browder sem var árum saman meðal stærstu erlendu fjárfestanna í Rússlandi. Hann telur að Kremlverjar tengist mörgum af þessum dauðsföllum.

„Þegar fólk í sama bransa deyr svona, þá líkist það að mínu mati, því sem ég vil kalla dularfullan morðfaraldur,“ sagði hann í samtali við ABC News.