Fjölmiðlamaðurinn Egill Helgason býr í miðbæ Reykjavíkur og hefur því eðli málsins samkvæmt sterkar skoðanir á framkvæmdum borgaryfirvalda á því svæði. Á Facebook-síðu sinni bendir hann á misheppnaða framkvæmd, að hans mati, sem eru stórar hjólagrindur úr stáli fyrir hjólandi vegfarendur.
„Tuð. Út um allan bæ er búið að setja upp svona hjólagrindur. En þær eru forljótar, plássfrekar – og það sem meira er – það sést varla nokkurn tíma hjól í þeim. Ágæt áform, en mislukkuð framkvæmd,“ skrifar Egill og birtir mynd sem sjá má hér fyrir neðan.
Færsla Egils hefur vakið talsverða athygli og hafa spunnist upp áhugaverðar umræður. Fjölmargir taka undir orð fjölmiðlamannsins um að engin bæjarprýði sé af grindunum. „Ég er hönnuður og hjólagrindur mættu alveg vera fallegri, sérstaklega af því þær taka pláss,“ bendir einn netverji á.
Allnokkrir hjólreiðamenn leggja þó orð í belg og segja að mikið not sé af grindunum enda skemmi þær ekki gjarðir hjóla eins og aðrar grindur. Margir kalla þó eftir annarri laus sem að sé fallegri og hafi sama notagildi.