Í dag var tilkynnt um umferðaróhapp í Garðabæ þar sem bíl hafði verið ekið á bílskúrshurð. Minniháttar meiðsli hlutust af þessu.
Þetta kemur fram í dagbók lögreglu þar sem farið er yfir ýmis verkefni dagsins.
Tilkynnt var um æstan mann í verslun í hverfi 108 Reykjavík. Hann gekk sína leið eftir samtal við lögreglu.
Í sama hverfi var tilkynnt um mann sem svaf í stigagangi. Var hann vakinn og gekk sína leið.
Tilkynnt var um eignaspjöll á bíl í miðborginni. Vitað er hver var að verki og er málið í rannsókn.
Tilkynnt var um þjófnað úr verslun í miðborginni og var þjófurinn fluttur á lögreglustöð þar sem hann gaf skýrslu og var síðan látinn laus.
Ennfremur var tilkynnt um innbrot og þjófnað úr íbúðarhúsi í hverfi 111. Innbrotsþjófurinn var handtekinn skammt frá vettvangi og málið er í rannsókn.