Búmm! Búmm! Búmm! Heyrðist í hvert sinn sem skotið var úr öflugu rússnesku fallbyssunni á yfirráðasvæði Úkraínumanna í Luhansk. Fyrir framan þetta færanlega stórskotaliðsvopn stóð rússneski stríðsfréttamaðurinn Aleksandr Kots og flutti fréttir af notkun þess. Fallbyssan getur skotið 130 kg sprengjum allt að 10 km leið með aðeins mínútu millibili. Öðrum tegundum sprengja getur hún skotið allt að 20 km. Forbes segir að talið sé að Rússar eigi 40-50 fallbyssur þessarar tegundar.

Hann myndaði sjálfan sig fyrir framan byssuna sem var af gerðinni 2S4 Tjulpan en hún er 240 mm og hleður sig sjálf. Hann sagði stoltur frá að með byssunni hefði mikilvæg brú á milli Lysytjansk og Severodontesk verið eyðilögð. Fallbyssan skýtur svo öflugum sprengjum að þær geta komist í gegnum byggingar sem hafa verið styrktar sérstaklega og stórar byggingar. Þetta er stærsta og öflugasta fallbyssa rússneska hersins og hefur verið nefnd „ofurfallbyssa rússneska hersins“. Forbes segir að engin fallbyssa í líkingu við þessa sé til á Vesturlöndum.

Hann birti síðan færslu á samfélagsmiðlum um þetta og myndir af fallbyssunni og staðnum þar sem hún var á iðnaðarsvæði nærri Rubisjne nærri Severodontesk. En hann sér líklega eftir því í dag.

240-мм миномет Тюльпан бьет по мосту, соединяющему Северодонецк с Лисичанском.
Еще больше эксклюзива из зоны СВО – в моем телеграме. Работаю на Северодонецком направлении. https://t.co/xS8LeSKG4d pic.twitter.com/6Ib9PdZ7Sf

— Александр Коц (@sashakots) May 20, 2022

Hæddur og þakkað fyrir aðstoðina

Upptökum Kots og myndum var ætlað að efla anda rússnesku þjóðarinnar vegna stríðsins og sýna afrek rússneska hersins í Úkraínu.

En það voru fleiri en Rússar sem fylgdust af athygli með útsendingu Kots. Daginn eftir að frétt Kots var sýnd birti úkraínski herinn myndband. Um upptöku frá dróna er að ræða og sýnir hún iðnaðarsvæðið þar sem Kots var daginn áður. Á upptökunni sást 2S4 í ljósum logum.

Úkraínskir hermenn sáu fréttina í rússneska sjónvarpinu þar sem sýnt var hvaðan Rússar skutu á brúna og nýttu sér þær að sjálfsögðu til að skjóta á byssuna og eyðileggja hana.

„Takk fyrir! Haldið þessu góða starfi áfram!“ var skrifað í hæðni á Facebooksíðu úkraínska hersins. „Fyrst lokkuðum við þá út úr byggingunni og síðan eyðilögðum við hana. Þakkir til rússneskra áróðursdreifara fyrir ábendinguna,“ skrifaði úkraínski herinn á Facebook og birti fleiri upptökur af árásinni á fallbyssuna.

Úkraínski herinn segir að mörg ökutæki rússneska hersins hafi einnig verið eyðilögð í árásinni.

Þetta mál staðfestir mikilvægi þess að halda staðsetningum sínum leyndum í stríði.