Skotárásin í Robb Elementary skólanum í bænum Uvalde í Texas í maí síðastliðnum er ein mannskæðasta skotárásin í bandarískum skóla. Hinn 18 ára gamli Salvador Ramos kom akandi að skólanum, gekk inn og byrjaði að skjóta bæði nemendur og kennara. Yfirvöld hafa verið harðlega gagnrýnd fyrir léleg viðbrögð við skotárásinni en lögreglumenn voru afar lengi að bregðast við.

Juan Maldonado var einn af fyrstu ríkislögreglumönnunum sem mættu á vettvang skotárásarinnar í grunnskólanum í Uvalde, Texas í maí síðastliðnum. Alls létust 19 nemendur og tveir kennarar í árásinni. Maldonado er nú einnig sá fyrsti af ríkislögreglumönnunum sem tóku þátt í aðgerðinni til að vera rekinn úr starfi.

„Við getum staðfest að Juan Maldonado var afhent uppsagnarbréf í dag,“ sagði talsmaður almannavarnadeildar Texas í samtali við ABC News í gær. Maldonado er 23 ára gamall og er sagður hafa verið hæstur í tign af þeim lögreglumönnum sem mættu fyrstir á vettvang í grunnskólanum.

Í upptökum úr búkmyndavélum sést Maldonado fyrir utan skólann í fjórar mínútur á meðan skotmaðurinn gekk laus í skólanum. Maldonado hékk við inngang skólans en fór ekki inn, samkvæmt New York Times fór hann ekki einu sinni inn eftir að lögreglumaður kom særður út úr byggingunni.

Sjá einnig: Mannskæðustu skotárásirnar í skólum Bandaríkjanna – Faraldur sem ekki sér fyrir endann á

Málið var rannsakað í þaula af almannavarnadeild Texas. Maldonado er sagður hafa útskýrt aðgerðaleysi sitt með því að enginn hafi skipað honum að fara inn, annars hefði hann gert það.

Fjölskyldumeðlimir þeirra sem létust í árásinni hafa sérstaklega gagnrýnt Maldonado þar sem hann á að vera mjög tengdur samfélaginu í Uvalde. „Hann hefði getað farið inn og bjargað börnunum og kennurunum í samfélagi sem hann þekkti svo vel,“ segir til dæmis ættingi Amerie Jo Garza, eitt af börnunum sem lést í árásinni, í samtali við ABC.