Lögreglustjórinn á höfuðborgarsvæðinu hefur ákært 21 árs gamlan karlmann fyrir þjófnað og líkamsárás á starfsmann Nettó í Þönglabakka. Ákæran var birt í Lögbirtingablaðinu í dag en þýðir að ekki hefur verið hægt að birta hinum meinta brotmanni ákæruna.
Hinum ákærða er gert að sök að hafa miðvikudaginn 28. október 2020, þá aðeins 19 ára, farið inn í áðurnefnda verslun Nettó og tekið þar vörur að verðmæti 1.265 krónur og yfirgefið versluna án þess að greiða fyrir vörurnar. Þá hafi starfsmaður verslunarinnar elt hinn ákærða út og haft afskipti af honum fyrir framan verslunina. Þá hafi hinn ákærði veist að starfsmanninum með ofbeldi og slegið hann með krepptum hnefa ítrekað í andlit, allt með þeim afleiðingum að starfsmaðurinn hlaut mar frá vinstra gagnauga niður á kinnbein, skrapsár á kinn, eymsli við netfrót og skrapsár á nefi.
Á hinn ákærði yfir höfði sér allt að 3 ára fangelsi vegna hins meinta brots auk þess sem gerð er kraf um að hann greiði allan sakarkostnað.
Í síðustu viku féll dómur í svipuðu máli í Héraðsdómi Reykjavíkur vegna atviks í verslun 10-11 við Laugaveg föstudaginn 19. febrúar 2021. Þá hafði viðskiptavinur ráðist gegn starfsmanni verslunar, sem gefið hafði viðkomandi fyrirmæli, og ítrekað slegið viðkomandi, ýmist með flötum eða krepptum hnefa, í andlit.
Játaði ákærði brot sitt greiðlega og sagðist það tengjast fíknivanda sem hann glímdi við. Var horft til þess að um fyrsta brot viðkomandi var að ræða og því var niðurstaða dómstólsins 30 daga skilorðsbundið fangelsi til tveggja ára.
