Lokað er inn á gossvæðið að Meradölum þar til annað verður ákveðið en ekkert ferðaveður er á svæðinu. Þetta kemur fram í tilkynningu frá Lögreglunni á Suðurnesjum en tilkynnt verður sérstaklega þegar ákveðið verður að opna svæðið að nýju.
Í fræðslu- og aðgerðahópnum Eldfjalla- og náttúrvárhóp Suðurlands, þar sem fylgst er vel með framgangi gossins, kemur fram að nokkrar breytingar hafi orðið á gosstöðvunum í Meradölum síðustu sólarhringa.
„Gosopum hefur fækkað frá upphafi eldgossins niður í þrjú op, en krafturinn í hverju opi virðist aðeins hafa færst í aukana. Vísbendingar eru um að nokkurskonar púlsandi virkni sé hafin í stærsta gosopinu. Að mestu leyti halda gusurnar sig innan gígbarmana sem hlaðist hafa upp, en inn á milli skjótast upp hraunstrókar sem rísa margfalt hærra en aðrar gusur. Miðað við falltíma hraunskvettanna má gróflega áætla að mestu strókarnir nái vel yfir 100 metra hæð. Fylgir þessu mikill óróleiki innan gígsins og drunurnar verða ansi háværar,“ segir í færslu hópsins í morgun.
Þá hafi hraunáin runnið austur inn í Meradali samfellt í nokkra daga og dælt þangað miklu magni hrauns yfir hið ársgamla hraun sem þar er fyrir.
