Vegna heimsfaraldurs kórónuveirunnar neyddust mörg ferðaþjónustufyrirtæki til að selja rútur sínar. Það er að koma í bakið á geiranum í dag því mikill skortur er á rútum og mun hann gera að verkum að ekki munu allir þeir erlendu ferðamenn, sem vilja fara í ferðir innanlands, geta fengið óskir sínar uppfylltar.

Fréttablaðið skýrir frá þessu í dag. Segir blaðið að töluvert hafi verið um að stórir bílar, þar á meðal rútur, hafi verið seldir úr landi í faraldrinum. Nú er ferðaþjónustan hins vegar að taka hraðar við sér en nokkur sá fyrir og þá stefnir í skort á rútum.

Stefán Gunnarsson, forstjóri Guðmundar Jónassonar ehf., sagði í samtali við Fréttablaðið að það sé brjálað að gera, bæði við flutning á fólki og einnig sé uppselt á mörgum hótelum víða um land í sumar.

„Við gengum í gegnum Covid, svo urðu launahækkanir og nú kemur mikil hækkun á aðföngum, ekki síst eldsneyti. Þetta hafa verið brekkur en sem betur fer er ferðaþjónustan að taka ótrúlega vel við sér,“ sagði hann.

Svo góður gangur er í þessu að ekki er öruggt að hægt verði að anna eftirspurn erlendra ferðamanna.