Formaður Sameykis, Þórarinn Eyfjörð, er sakaður um ógnarstjórn í úttekt sálfræðistofunnar Lífs og sálar sem var falið að gera úttekt á skrifstofu félagsins eftir að starfsánægja fékk falleinkunn. Formanninum er lýst sem kröfuhörðum stjórnanda með stjórnendastíl sem jaðri við ógnarstjórn. Heimildin hefur fengið skýrsluna í hendur, en leynd hefur hingað til hvílt yfir niðurstöðum úttektarinnar.

Það var um miðjan desember sem Vísir greindi frá mikilli óánægju á skrifstofu stéttarfélagsins. Óánægjan kom í ljós í niðurstöðu könnunarinnar Stofnun ársins. Í kjölfarið var leitað til Lífs og sálar eftir úttekt og voru niðurstöður kynntar starfsfólki og stjórn í desember. Hvorki félagsmenn né blaðamenn hafa þó fengið skýrsluna afhenta þegar eftir því hefur verið leitað. Ekki fyrr en nú, en Heimildin hefur skýrsluna nú undir höndum og hefur leitað viðbragða Þórarins við henni.

Þar lýsir tæplega helmingur starfsfólks vanlíðan í vinnu. Fyrir ástandinu eru nefndar fjölmargar samverkandi ástæður en meðal annars megi rekja óánægju til Þórarins. Skýrslan nefnir að slæmir samskiptahættir, stjórnunaraðferðir og gamaldags karllæg viðhorf hafi stuðlað að ósætti, og þar komi formaðurinn mikið við sögu.

Starfsfólk tekur þó fram að Þórarinn sé vel máli farinn og metnaðarfullur. Hann eigi þó til að vera mjög hvass og setja óraunhæfar kröfur. Er Þórarinn í skýrsluni hvattur til að taka gagnrýnina til sín og nýta til að bæta stjórnundarstíl. Eins er hann hvattur til að hlusta betur á starfsfólk og sýna meiri auðmýkt.

Sérstaklega eru viðbrögð Þórarins við tilteknu máli talin ámælisverð. Þá hafi starfsfólk viljað kjósa sér trúnaðarmann en Þórarinn tekið illa í þær hugmyndir. Þegar starfsfólk kaus sér engu að síður trúnaðarmann hafi formanninum brugðið og hann svo reiðst.

Þórarinn sagði í svörum til Heimildarinnar að lýsingar á meintri ógnarstjórn séu ekki nákvæmar. Hann telur sig ekki hafa fengið yfir neinn en taki þó mark á gagnrýninni. Í baráttu stéttarfélags sé ekki óþekkt að formen séu með hvassan tón.

Nánar má lesa um skýrsluna og viðbrögð Þórarins í frétt Heimildarinnar.

Vísir leitaði eins viðbragða Þórarins. Þar gekkst hann við því að hann hafi á köflum gengið of hart fram. Starfshópur skrifstofunnar hafi þó unnið þétt saman til að bæta starfsánægjuna og öflugt umbótastarf hefur gengið vel. Niðurstöður reglulegra starfsánægjumælinga sýni að skrifstofan sé á réttri leið. Í dag sé andinn mjög góður, starfsfólk standi þétt saman og horfi til framtíðar.