Rússnesk stjórnvöld hafa tekið rússneska fjölmiðla kverkataki til að stýra fréttaflutningi af innrás Rússa í Úkraínu. Allt önnur mynd er dregin upp af gangi stríðsins í rússneskum fjölmiðlum en fjölmiðlum utan Rússlands. Rússneski herinn hefur orðið fyrir miklu mannfalli og tjóni í stríðinu en þessum upplýsingum er haldið leyndum fyrir rússneskum almenningi.

Með nýjum lögum sem gera refsivert að segja aðrar fréttir af stríðinu en rússnesk yfirvöld hafa samþykkt sést berlega að rússnesk stjórnvöld hafa ekki mikla trú á gangi innrásarinnar sem hefur ekki gengið eins og lagt var upp með.

Nú standa Rússar vinafáir á alþjóðavettvangi og eru beittir hörðum refsiaðgerðum. Margra ára uppbygging sambanda og tengslaneta á alþjóðavettvangi er að engu orðin og fáir vilja hafa nokkuð saman við þá að sæla.

Micheal Kofman, hjá bandarísku hugveitunni CNA í Washington, telur að Rússar eigi á hættu að geta þeirra til hernaðar í Úkraínu verði orðin ansi lítil eftir um þrjár vikur. Hann segir að miðað við þau vandamál sem þeir hafa glímt við í birgðaflutningum og að áætlanir þeirra hafi ekki gengið eftir þá séu um þrjár vikur í að hersveitir þeirra verði örmagna og geti ekki barist lengur.