Volodymyr Zelenskyy, forseti Úkraínu, sagði í morgun að tæplega 6.000 rússneskir hermenn hafi fallið í átökunum í Úkraínu en þau hafa staðið yfir síðan síðasta fimmtudag. Rússar hafa ekki staðfest þessar tölur en rússnesk yfirvöld reyna að halda tölum um fjölda fallinna leyndum.

Forsetinn sagði að Rússland geti ekki sigrað í þessu stríði með „sprengjum, loftárásum og eldflaugum“ sem hafi rignt yfir úkraínskar borgir síðustu sólarhringa. Hann sagði einnig að rússnesk stjórnvöld hyggist „eyða sögu okkar“ en það sagði hann vegna þess að rússnesk eldflaug lenti á Babyn Yar Helfarar minnismerkinu í Kyiv í gær.

Í færslu á Facebook frá úkraínska hernum kemur fram að mórallinn meðal rússneskra hermanna sé slæmur og baráttuvilji þeirra lítill.