Skömmu fyrir klukkan eitt í nótt sinnti ökumaður ekki stöðvunarmerkjum lögreglunnar þegar hún hugðist hafa tal af honum í Garðabæ. Hann reyndi að stinga af og hófst þá eftirför. Skömmu síðar stöðvaði ökumaðurinn og hljóp frá bifreiðinni en hann fannst skömmu síðar og var handtekinn. Hann er grunaður um að hafa verið undir áhrifum áfengis og fíkniefna og fleiri brot. Hann var vistaður í fangageymslu.
Fimm aðrir ökumenn voru handteknir í gærkvöldi og nótt grunaðir um að vera undir áhrifum áfengis og/eða fíkniefna. Einn þeirra reyndist vera sviptur ökuréttindum og annar var með meint fíkniefni í fórum sínum. Bifreið þess þriðja var fjarlægð með dráttarbifreið þar sem ökumaðurinn vildi ekki heimila lögreglunni að færa bifreiðina af akbrautinni.
