Um klukkan þrjú í nótt gáfu lögreglumenn ökumanni bifreiðar merki um að stöðva aksturinn í Hlíðahverfi þar sem ökuljós bifreiðarinnar, sem hann ók, voru ekki tendruð. Ökumaðurinn sinnti ekki stöðvunarmerkjum lögreglunnar og jók hraðann. Að lokum stöðvaði hann þó og kom þá í ljós að hann er aðeins 15 ára. Foreldri kom á lögreglustöð og sótti ökumanninn unga.

Á níunda tímanum í gærkvöldi var akstur ökumanns stöðvaður í Háaleitis- og Bústaðahverfi. Mikla fíkniefnalykt lagði úr bifreiðinni og heimilaði ökumaðurinn lögreglunni að leita í henni. Við þá leit fundust ætluð fíkniefni sem hald var lagt á.

Á tíunda tímanum var ökumaður handtekinn í Háaleitis- og Bústaðahverfi en hann er grunaður um að hafa verið undir áhrifum fíkniefna og vörslu fíkniefna. Hann var fluttur á lögreglustöð og að lokinni sýnatöku var hann sviptur ökuréttindum til bráðabirgða vegna ítrekaðra brota af þessu tagi.

Skömmu eftir miðnætti var tilkynnt um innbrot í fyrirtæki í Háaleitis- og Bústaðahverfi. Þar var tölvu stolið.