„Fyrir tæpu ári drap læknir mig næstum því vegna þess að ég var „of snyrtileg. Ég var að deyja hægum og kvalarfullum dauða úr ógreindri sykursýki 1“,“ segir Lára Guðrún Jóhönnudóttir í Twitter-þræði sem vakið hefur athygli. Fréttablaðið greindi fyrst frá en tilefni skrifa Lára Guðrúnar var frétt blaðsins um að umsækjanda um örorkulífeyri hafði verið hafnað út af of góðri umhirðu.
Á meðan Lára Guðrún leitaði eftir skýringum á veikindum sínum, sem hún vissi ekki þá að voru tilkomin vegna sykursýki 1, missti hún fjórtán kíló á nokkrum mánuðum og að eigin sögn helming af hári sínu. „Drakk 16 lítra á dag vegna djöflaþorsta, með spasma í fótum, sár sem höfðu ekki gróið vikum saman, sveppasýkingar, hugræn geta var nær engin og fleiri erinkenni sem fylltu A4-blað,“ segir Lára Guðrún í færslu sinni.
Fyrir tæpu ári drap læknir mig næstum því vegna þess að ég var “of snyrtileg”. Ég var að deyja hægum og kvalafullum dauða úr ógreindri sykursýki 1. Þá þykknar í manni blóðið og þetta svipar til hægfara heilablæðingu. 1/ https://t.co/Bz6x5QUtoi
— Lara Gudrun Joh (@larayoh) August 1, 2021
Því miður var heimilislæknir Láru Guðrúnar ekki við þegar veikindin byrjuðu að hrjá hana en hún lýsir viðkomandi sem yndislegum lækni sem myndi vaða eld og brennistein fyrir hana. Hún segist í kjölfarið hafa gengið milli lækna án þess að fá neinar skýringar nema að vandamálið væri líklega streita. Þá lýsir hún því hvernig hættulega lág kalíumgildi í blóði hennar hafi verið hunsuð af lækni sem að gaf í skyn að hún væri mögulega að misnota áfengi eða þjáðist af átröskun. „Fólk er lagt inn á spítala með hraði og gefið inngjöf í æð til að koma í veg fyrir hjartastopp eða að lungu falli saman. Tennur líka byrjaðar að losna,“ skrifar Lára Guðrún.
Hún telur, eins og áður segir, að ástæðan fyrir því að læknar gáfu henni ekki gaum var að hún var of snyrtileg til fara. „Og vel að máli farin. Kunni að tjá mig. Leit ekki út fyrir að vera deyjandi. En örvæntingafull í augum.“ Hún segir allar líkur á því að hún hefði dáið í svefni milli jóla og nýárs ef að hjúkrunarfræðingur á krabbameinsdeild hefði ekki bent henni á að láta mæla blóðsykur sinn. Þannig hafi orsök veikinda hennar uppgötvast..
Lára Guðrún segir tímabært að sleppa tökunum af fordómum og fyrirfram gegnu áliti byggt á útliti fólks. Hún bendir á að mörgum sem glíma við langvinn veikindi finnist gott að klæða sig upp þegar það á erindi eitthvað, til dæmis tíma hjá lækni.
„Ég allavega sé eftir því að hafa farið í fallegu vetrarkápuna mína og sett á mig farða og reynt að greiða hárið þannig að það sæist ekki hversu þunnt það væri. Hversu tekin ég væri í andlitinu. Það var næstum dauðadómur minn.