Gífurleg óánægja virðist vera hjá mörgum sem keyptu streymi hjá Senu að Brekkusöngnum sem sendur er út frá mannlausum Herjólfsdal í Vestmannaeyjum í kvöld. Fólk kvartar undan afar litlum myndgæðum og hjá mörgum er útsendingin einfaldlega frosin. Kvörtunum rignir inn á Facebook-síðu Senu.
„Það er ekki hægt að horfa á streymið. Alltaf að frjósa. Búin að fara í lægstu gæði og ekkert að netinu. Augljóslega eitthvað að hjá ykkur fyrst þetta er svona hjá flest öllum,“ segir kona ein.
„Vonlaust streymi, höktir og hikstar. Spilar í 3 sek og stoppar í 30. Er að gefast upp á þessu,“ segir önnur kona og birtir mynd af óskýrum skjánum.
„Sama reynsla hér á streymi… við erum búin að prófa allt sem bent er á hér og virkar ekki. Horfum á margt gegnum streymi og aldrei verið vandamál nema núna,“ segir enn einn áhorfandi af öllum þeim fjölmörgu sem kvarta.
„Finnst ykkur þetta i lagi?? I verstu gæðum?“ segir kona og birtir mynd af óskýrum skjáum sínum.
Ljóst er að útsendingin hefur farið úrskeiðis.
„Þetta er handónýtt. Við viljum einnig endurgreitt,“ segir maður einn og líklega taka margir undir með honum.
Fleiri ummæli:
„Ekki hægt að horfa, endalaust að frjósa. Sé eftir þessum peningum enda verður örugglega ekki auðvelt að fá endurgreitt“
„Búin að gera allt sem þið bendið fólki á að gera og hraðatesta netið hjá mér… virkar ekki einusinni í lélegustu gæðum! Það bara hlýtur eitthvað að vera að hjá ykkur“
„Hvað er að frétta Sena?? Það er allt í steik, þetta er loksins hætt að lagga, af því þetta er alveg dottið út !!“