Eins og DV skýrði frá í gær þá var Sólveig Lilja Óskarsdóttir handtekin vegna óspekta á Suðurlandsbraut þar sem barnshafandi konur biðu í röð eftir að komast í bólusetningu gegn kórónuveirunni. Að sögn lögreglunnar var Sólveig handtekin fyrir óspektir á almannafæri og fyrir að neita að hlýða fyrirmælum lögreglunnar, meðal annars um að setja upp andlitsgrímu og segja til nafns.

RÚV birti upptöku af vettvangi í gær þar sem sjá má Sólveigu í átökum við heilbrigðisstarfsfólk og lögregluna. Hún heyrist öskra: „Óléttar konur eru að fara í sprautu og drepast! Og drepast! Það er eitur í þessum sprautum!“

Fréttablaðið segir að Sólveig Lilja sé starfandi dagforeldri í Mosfellsbæ miðað við skráningu á vef sveitarfélagsins.

Sólveig Lilja mætti í viðtal hjá Reykjavík síðdegis á Bylgjunni í gær og hafnaði því að hún hefði „látið öllum illum látum“ og að barnshafandi konur hafi óttast hana og farið að gráta undan henni. Hún sagði þetta stangast á við upplifun hennar af atburðum dagsins og að hún geti sannað það með myndbandsupptöku.