Í morgun greindi Fréttablaðið frá því að hæstaréttarlögmaðurinn Vilhjálmur H. Vilhjálmsson myndi ekki sjá lengur um mál Ingólfs Þórarinssonar, Ingó Veðurguðs. Líkt og flestir vita hafði Vilhjálmur sent kröfubréf á nokkra einstaklinga vegna ummæla er varða meint kynferðisbrot Ingós.

Líklega velta margir fyrir sér hvers vegna samstarf þeirra sé nú búið. Ingó hefur nú gefið sína skýringu, en hann segir ástæðuna vera að Vilhjálmur sé með svo margt á sinni könnu. Þetta segir hann í samtali við RÚV.

„Þetta er orðið aðeins yfirgripsmeira en við héldum í upphafi,” er haft eftir honum, og svo bætir hann við: „Vilhjálmur er í öðrum verkefnum, meðal annars erlendis, þannig að þetta er bara orðin of mikil vinna.”

Auk þess segir Ingó: „Við [Vilhjálmur] erum búnir að eiga samtöl síðan þetta byrjaði og að lokum ákváðum við að þetta væri of mikið, miðað við þau verkefni sem hann er í . Ég vil bara að þetta verði einhver sem getur sinnt þessu að fullu.”

Ingó segist núna vera í viðræðum við þrjár lögmannsstofur um að að fara með málin fyrir sig, og að pælingin sé að láta fleiri sjá um þessi mál.