Á síðari árum hefur verið fjallað um nafnið, sem þykir fordómafullt, í erlendum fjölmiðlum. Nafnið vísar nefnilega til þjóðsögu um gyðinginn gangandi sem á að hafa átt þátt í að pynta og krossfesta Jesú Krist. Nú hefur fólk verið hvatt til þess að nota frekar orðin göngugarpur eða flakkari yfir blómið.
Umræðurnar byrjuðu í blómahópnum þegar meðlimur deildi mynd af blóminu sínu og skrifaði: „Fallegur Gyðingurinn hjá mér“. Fyrstu ummælin sem færslan fékk vörðuðu fegurð sjálfs blómsins, en ein athugasemd kveikti í fólki: „Blómið er fallegt, fordómarnir ekki.“
Fólk tók misvel í þessi ummæli, sumir þökkuðu fyrir að verið væri að benda á að nafnið væri óþægilegt, en öðrum fannst út í hött að setja út á það þar sem blómið hefði verið kallað gyðingurinn gangandi í fjöldamörg ár.
„Þið eruð illa ruglaðar að halda þessu fram. Því stíga gyðingar ekki fram til að mótmæla þessu nafni? Líklega því þeir hafa ekki hugmynd um það og/eða er alveg sama.“ sagði einn meðlimur hópsins, annar sem var ekki sáttur með gagnrýnina sagði: „Það er svo skrýtið, að Íslendingar eru endalaust að móðgast fyrir hönd annarra, vegna þess að þeir halda að einhver sé sár og móðgaður, vegna einhvers eins og t.d nafns á plöntu, þá vilja þau að öll línan taki þátt í gjörningum.“
Þessu var svarað af þeim sem finnst nafnið óviðeigandi. „Það minnsta sem við getum gert sem partur af kristinni þjóð er að breyta okkar særandi orðum og hegðun gagnvart fólki sem er með önnur trúarbrögð heldur en við, enda var það aðallega kristið fólk sem drap og kúgaði fólk í aldir fyrir það að vera ekki sömu trúar,“ sagði einn blómaunnandi og annar sagði reiður og kaldhæðinn: „Um að gera að ríghalda í fordómana og berjast fyrir því að fá að nota orð sem særa aðra. Fátt sem gerir lífið skemmtilegra en það. Það er auðvitað réttur allra að særa annað fólk. “
Einn meðlimur hópsins furðaði sig á málinu og sagði að hann myndi halda áfram að kalla blómið gyðing þrátt fyrir að hann yrði kallaður rasisti. „Það er nú bara orðið þannig að maður má ekki reka við öðruvísi en að vera ásakaður um að vera rasisti. Ég á gyðing og mun kalla hann áfram gyðing án þess að mér detti eitthvert fólk í hug.“ Annar sagðist vera orðinn fullsaddur á öllu „fordómatali“ og sagði þá sem stunda það eyðileggja stemmingu. „Er hægt að sleppa þessu fordóma tali hér? Er ekki nóg af því annars staðar? […] Það er svona fólk eins og þú sem rífur niður stemmingu og hefur ekki hugmynd um hvað fordómar eru.“
Líkt og áður segir voru umræður um málið ansi miklar, og ekki hægt að segja að sátt hafi færst í málið. Þó er vert að taka fram að einstaklingurinn sem birti færsluna með myndinni af blóminu er búinn að biðjast afsökunar og segist ekki hafa áttað sig á því að sumum gæti þótt heitið særandi.
„Úff, mig langaði bara að sýna ykkur mynd af blóminu mínu. Mér var sagt fyrir nokkrum árum að þetta væri nafnið á því. Aldrei datt mér í hug að svona umræða færi af stað um þetta blóm. Ég biðst afsökunar ef ég hef móðgað/sært einhvern. Eigið gott kvöld.“