Bæjarráð Ísafjarðarbæjar hefur falið bæjarstjóra bæjarins að semja við rekstraraðila Edinborgarhússins um að halda þar úti salernisaðstöðu fyrir ferðamenn hluta úr ári. Þetta kemur fram í frétt bb.is.
Þar segir að samningur bæjarstjórans við Edinborgarhúsið yrði lagður fyrir bæjarstjórn til samþykktar, en gert er ráð fyrir að hann yrði vegna hásumarmánaðanna næstu þrjú árin, frá maí og fram í miðjan september.
Tillagan snýr að því að Edinborgarhúsið myndi innheimta fast mánaðargjald fyrir að halda úti klósettaðstöðunni og myndi í staðinn sjá um að halda aðstöðunni þrifalegri.
Í húsinu í dag eru ferðaskrifstofa, upplýsingamiðstöð ferðamála, veitingahús sem tekur 100 manns við borð auk þess sem húsið hýsir reglulega menningarviðburði. Húsið var reist 1907, að því er segir á heimasíðu hússins. „Bar það höfuð og herðar yfir flest mannanna verk á norðanverðum Vestfjörðum,“ segir þar jafnframt. Húsið er teiknað af Rögnvaldi Ólafssyni, arkitekt og húsameistara ríkisins og staðsetning þess einkar glæsileg, við Pollinn í gamla bænum.
Hvort Rögnvaldi hafi einhvern tímann órað fyrir því að húsið yrði miðstöð grunnþarfaþjónustu fyrir þúsundir ferðamanna á geysistórum skemmtiferðaskipum, liggur ekki fyrir, en sumarið fyrir Covid komu 130 skemmtiferðaskip til Ísafjarðar með samtals 117.856 ferðamenn um borð, samkvæmt heimasíðu bæjarins.