Tveir starfsmenn leikskólans Laufásborg sem rekinn er af Hjallastefnunni hafa greinst smitaðir af Covid-19. Þetta staðfestir Matthildur L. Hermannsdóttir, skólastýra, í samtali við DV.
Fyrra smitið greindist á sunnudag og fór fjöldi starfsmanna ásamt einum bekk í sóttkví. Hitt smitið greindist í dag. Í bekknum eru 24 nemendur en skólinn hafði farið í sumarfrí föstudaginn áður. Því settu smitin strik í reikninginn hjá einhverjum fjölskyldum sem höfðu planað að fara í útilegur eða út á land.
„Börnin eru í góðum málum og eru hjá fjölskyldum sínum. Foreldrarnir tóku þessu með ofboðslega miklu æðruleysi og stóðu sig rosalega vel við að fá þessar fréttir,“ segir Matthildur.
Allir starfsmenn leikskólans eru bólusettir fyrir Covid-19. Börnin verða í sóttkví þar til á morgun þegar þau fara í skimun.