Maðurinn sem játaði að hafa framið morðið á Armando Bequiri í Rauðagerði í febrúar og maðurinn sem situr í gæsluvarðhaldi vegna andláts Daníels Eiríkssonar í Kópavogi um helgina tengjast. Þetta kemur fram í viðtali Vísis við Margeir Sveinsson, yfirlögregluþjón hjá miðlægri deild Lögreglunnar á höfuðborgarsvæðinu. Þrátt fyrir að tengsl séu á milli mannanna telur lögreglan ekki að málin tengist.

„Þeir höfðu verið í einhverjum samskiptum áður, já,“ segir Margeir þegar hann er spurður um tengslin milli mannanna tveggja. Hann segist ekki geta sagt neitt um það hvort mennirnir hafi verið í einhverri starfsemi saman en hann segir að þeir séu ekki af sama þjóðerni. Annar er frá Albaníu en hinn er frá Rúmeníu.

Þrátt fyrir að mennirnir séu báðir tengdir tveimur mismunandi andlátum þá finnst Margeiri það ekki sérstaklega athyglisvert að þeir hafi verið áður í samskiptum við hvorn annan. „Ísland er nú ekki stórt og fjölmennt. Þannig að það getur alveg átt sér stað og hefur eflaust gerst í öðrum málum. Ég veit það ekki. En ég get ekki farið út í það sérstaklega,“ segir hann þegar blaðamaður Vísis spurði hann hvort honum þætti tengslin ekki athyglisverð. Þá segist Margeir að lögreglan sé ekki að skoða tengsl mannanna sérstaklega.