Undanfarna daga hafa margir hér á landi vart talað um annað en sóttkvíarhótelið í Þórunnartúni. Einn þeirra sem hefur tjáð sig mikið um málið er hæstaréttarlögmaðurinn Sveinn Andri Sveinsson en hann telur að það sé í góðu lagi að fólk sé skyldað til að dvelja á hótelinu.
„Að leggja að jöfnu dvöl á hótelherbergi og vist í fangaklefa verður seint talin mikil speki,“ sagði Sveinn Andri þegar umræðan um sóttkvíarhótelið hófst en þá höfðu margir líkt dvölinni þar við hryllilegar stofnanir eins og Guantanamo Bay og Gúlagið. Þá höfðu einnig einhverjir líkt því við Norður-Kóreu.
Sveinn Andri hefur svo í kjölfarið fært rök fyrir því að það sé löglegt að skylda fólk til að dvelja á hótelinu. Sveinn vísar í 13. grein laga númer 2/2021 sem samþykkt voru á Alþingi í febrúar á þessu ári. Sveinn segir að í greininni sé kveðið á um að ráðherra geti með reglugerð, að fenginni tillögu sóttvarnarlæknis, kveðið á um að gripið skuli til sóttvarnarráðstafana vegna hættu á að farsóttir berist til eða frá Íslandi.
„Lögin veita sumsé heilbrigðisráðherra heimild til þess að kveða á um það í reglugerð að ferðamenn séu settir í sóttkví. Er það augljóslega í sóttvarnaryfirvalda að meta það hverju sinni um hvers konar sóttkví er að ræða.“
Nýjasta innlegg Sveins í umræðuna er þó ekki lagabókstafur heldur skopmynd sem mörgum hefur fundist vera einstaklega fyndin. Um er að ræða svokallað jarm (e. meme) þar sem sjá má tvo hunda, annar er sterkari og stærri en hinn sem á að vera nokkurs konar aumingi. Í skopmyndinni sem Sveinn deildi er gert grín að Íslendingum í dag sem kvarta yfir því að dvelja í 5 daga á hóteli á meðan Íslendingar á árum áður þurftu að kljást við mun stærri vandamál.
Myndina sem um ræðir má sjá hér fyrir neðan: