„Því miður höfum við fengið margar tilkynningar vegna svika sem korthafar eru að lenda í. Við viljum vara fólk við.“
Þetta segir Jónína Ingvadóttir, deildarstjóri í markaðdeild Valitors, í tilkynningu sem send var á fjölmiðla í dag þar sem varað er við svikahröppum. „Enn á ný viljum við vara korthafa við sviksamlegum SMS skilaboðum og tölvupóstum í nafni DHL og Póstsins,“ segir hún en efni skilaboðanna er að pakki sé á leiðinni og að móttakandinn þurfi að greiða smágjald fyrir móttöku. Þá kemur tengill sem fylgir á síðu þar sem viðkomandi á að setja inn kortaupplýsingarnar sínar.
„Þær upplýsingar eru síðan misnotaðar og geta einstaklingar staðið uppi með töluvert tjón sem er frá tugum upp í hundruð þúsunda króna,“ segir Jónína. „Við viljum ítreka fyrri viðvaranir og biðjum fólk að opna ekki hlekki sem fylgja skilaboðunum og gefa ekki upp undir neinum kringumstæðum korta- eða persónuupplýsingar. Einnig er mikilvægt er að gefa alls ekki upp öryggiskóða sem berst með SMS til að ljúka við greiðslu.“
Hún segir að í þessum textaskilaboðum séu ítarlegar upplýsingar um það sem korthafi er að samþykkja með staðfestingakóðanum, afar mikilvægt sé að lesa skilaboðin vel, athuga upphæð og gjaldmiðil og ekki skal áframsenda kóðann í blindni. „Því miður eru dæmi um að korthafar hafi tapað háum upphæðum vegna svika af þessum toga,“ segir Jónína.
Hafi fólk brugðist við skilaboðum og gefið upp öryggiskóða er brýnt að hafa samband strax við viðskiptabanka sinn eða þjónustuver Valitor í síma 525-2000 utan opnunartíma bankans. Jafnframt er bent á að tilkynna svik til lögreglunnar á netfangið cybercrime@lrh.is.