Inniliggjandi sjúklingar með Covid-19 á Landspítalanum eru í dag 19 talsins, og hefur þeim því fækkað um tvo síðan í gær, en þá lágu 21 inni. Þetta kemur fram í tilkynningu frá Landspítalanum og uppfærðum tölum á covid vefsvæði spítalans.

Í lok síðustu viku voru 14 inniliggjandi með Covid, en þeim fjölgaði um 7 á einu bretti eftir hópsmit á hjartadeild þegar sjúklingar sem voru þegar inniliggjandi af öðrum ástæðum smituðust af Covid.

Fækkun inniliggjandi sjúklinga hljóta að teljast góðar fréttir fyrir land og þjóð í baráttunni við faraldurinn sem brátt markar tveggja ára afmæli sitt hér á landi. Þórólfur Guðnason sóttvarnalæknir sagði þannig í gær að kæmi í ljós að innlögnum myndi ekki fjölga vegna gríðarlegrar útbreiðslu Ómíkron afbrigðisins væri hægt að ráðast í afléttingar á takmörkunum hér á landi, sem eru þær hörðustu á Norðurlöndum.

Þá sagði New York Times jafnframt frá því í vikunni að sterkar vísbendingar væru um að Ómíkron afbrigðið gengi hraðar yfir, þ.e. tími frá smita og þar til einkenni kæmu fram væri styttri, og jafnvel mun styttri, en hjá fyrri afbrigðum kórónuveirunnar SARS-Cov-2, sem hjá sumum veldur Covid-19 sjúkdómnum. Er bandaríska sóttvarnastofnunin CDC sögð hafa litið til slíkra rannsókna þegar þau tóku ákvörðun um að stytta einangrunartíma einkennalausra úr tíu dögum í fimm.

Fleiri lönd hafa síðan riðið á vaðið með styttingu einangrunartíma einkennalausra, nú síðast Spánn sem tilkynnti styttingu í morgun. Þórólfur sagði slíkt þó ekki tímabært hér á landi í bili.