Matvælastofnun (MAST) hafa í yfirlýsingu þakkað dýravelferðarsamtökunum AWF/STB fyrir veitta aðstoð við rannsókn á meintum alvarlegum brotum gegn velferð blóðtökuhryssna, en samtökin birtu nýlega heimildarmynd sem hefur vakið mikla athygli. Þar má líta aðila sem starfa við blóðtöku úr fyfullum hryssum slá í dýrin með höndum og tólum, hundum sigað á hryssurnar, og það sem lítur út fyrir að vera frekar frumleg og óörugg aðstaða til blóðtöku.

MAST segja í yfirlýsingu í dag að rannsókn málsins haldi áfram og eins sé verið að vinna að endurskoðun á þeim skilyrðum sem sett eru fyrir blóðtöku úr blóðmerum hér á landi.

„Ábendingar um alvarleg dýravelferðarbrot eru ávallt teknar mjög alvarlega hjá stofnuninni.“

MAST segjast hafa opið bréf sem dýravelferðarsamtökin sendu frá sér í gær til hliðsjónar við rannsókn sína.

„Stofnunin tekur undir með samtökunum að mikilvægt sé að rannsóknin beinist ekki síst að kerfisbundnum veikleikum í starfseminni sem geta komið niður á velferð hryssnanna.“

MAST segjast styðja að heildstæð umræða fari fram um framtíð greinarinnar en það sé mikilvægt að hafa í huga að um fimm þúsund blóðmerar séu haldnar hér á landi.

„Matvælastofnun styður að heildstæð umræða fari fram um framtíð greinarinnar en telur mikilvægt að í þeirri umræðu sé ekki gripið til skyndiákvarðana. Slík ákvörðun gæti stefnt velferð allt að 5000 hryssna í voða, m.a. væri þá hætt við að fjöldi hryssna kæmi til slátrunar seint á meðgöngu.“