Um klukkan 18 í gær var ekið á 11 ára barn sem var að fara yfir gangbraut í Kópavogi. Það meiddist á hönd og var flutt með sjúkrabifreið á bráðadeild.

Á sjötta tímanum í gær voru tveir menn handteknir í Miðborginni, grunaðir um þjófnað úr búningsklefum í íþróttahúsi. Þeir voru vistaðir í fangageymslu.

Á sjöunda tímanum í gær var ofurölvi maður handtekinn í Laugardalshverfi. Hann hafði verið að trufla unga drengi sem voru á íþróttaæfingu. Hann er einnig grunaður um vörslu fíkniefna og þjófnað. Hann var vistaður í fangageymslu.

Á ellefta tímanum var ekið á tvær bifreiðar og stakk tjónvaldur síðan af. Hann var handtekinn skömmu síðar en hann er grunaður um ölvun við akstur og akstur án gildra ökuréttinda. Hann var vistaður í fangageymslu.

Einn ökumaður var handtekinn í nótt grunaður um að vera undir áhrifum fíkniefna og ítrekaðan akstur án gildra ökuréttinda. Bifreið hans reyndist ótryggð og voru skráningarnúmerin tekin af henni.

Einn ökumaður var kærður fyrir að aka sviptur ökuréttindum í gærkvöldi.