Um síðustu mánaðamót höfðu Sjúkratryggingar Íslands (SÍ) greitt einkaaðilum 240 milljónir króna fyrir hraðpróf vegna kórónuveirunnar. Greiðslurnar byggjast á reglugerð, sem Svandís Svavarsdóttir þáverandi heilbrigðisráðherra, setti í september um greiðslu SÍ fyrir töku hraðprófa hjá einkaaðilum frá 20. september.

Fréttablaðið skýrir frá þessu. Í tilkynningu, sem heilbrigðisráðuneytið sendi frá sér þann 17. september segir: „Markmiðið er að auka aðgengi almennings að hraðprófum þar sem fleiri aðilum verður kleift að bjóða þessa þjónustu, notendum að kostnaðarlausu, óháð tilgangi prófanna.“

Samkvæmt svari SÍ við fyrirspurn Fréttablaðsins höfðu SÍ greitt um 240 milljónir króna í lok nóvember fyrir hraðpróf. Þetta eru greiðslur fyrir 10 vikur.

Þeir einkaaðilar sem hafa fengið þessar greiðslur eru á BSÍ, í Kringlunni, á Kleppsmýrarvegi í Reykjavík, á Aðalgötu í Reykjanesbæ og við Háskólann á Akureyri.

Heilsugæsla höfuðborgarsvæðisins sér um hraðpróf við Suðurlandsbraut og sýnatökur eru á heilbrigðisstofnunum um allt land. Óskar Reykdalsson, forstjóri Heilsugæslu höfuðborgarsvæðisins, sagði í samtali við Fréttablaðið að kostnaður stofnunarinnar í heild við allar sýnatökur á flugvelli og á Suðurlandsbraut hafi verið um 460 milljónir á fyrstu 10 mánuðum ársins.

„Hraðgreiningarprófum hefur fjölgað mikið að undanförnu. Við tókum 26 þúsund sýni á mánuði í júlí og ágúst en síðan þá er aukning og núna förum við stundum yfir sex þúsund sýnatökur á dag,“ sagði hann.