Karlmaður á fertugsaldri þarf nú í desember að svara fyrir röð afbrota sem öll tengjast fíkniefnum. Um fjórar ákærur er að ræða sem teknar hafa verið saman í eitt dómsmál. Lögreglan á höfuðborgarsvæðinu sem og héraðssaksóknari sækja málin saman.

Maðurinn er ákærður fyrir að hafa samtals sex sinnum ekið bifreið án þess að vera til þess hæfur sökum áhrifa ávana- og fíkniefna og slævandi lyfja. Í eitt skiptanna fundust fíkniefni í fórum mannsins.

Þá er maðurinn í ákærunni sagður hafa óhlýðnast lögreglu. Fyrst með því að neita að stöðva bifreið sem hann ók þegar lögreglan gaf honum merki um að stöðva akstur. Í stað þess ók maðurinn suður Krýsuvíkurveg og inn að Gjáhellu í iðnaðarhverfinu vestan við Vellina í Hafnarfirði, til móts við álverið. Óhlýðnaðist maðurinn þá skipunum lögreglu um að sitja eftir í bílnum, að því er fram kemur í ákærunni, og svo síðar neitað að hlýða enn öðrum fyrirmælum lögreglunnar um að leggjast niður.

Svo fór reyndar þetta örlagaríka kvöld að átök brutust út milli lögreglumannanna og dópaða ökumannsins, ef marka má ákæru lögreglunnar og héraðssaksóknara. Er maðurinn þar sagður hafa ráðist með spörkum og höggum að lögreglumönnunum og loks kastað gasgrilli í átt að þeim. Hlutu lögregluþjónarnir minni háttar meiðsl af árásinni. Segir í ákærunni að maðurinn hafi reynst óhæfur til þess að stjórna bifreiðinni sökum vímuefnaneyslu.

Loks er þessi sami maður ákærður fyrir meiriháttar fíkniefnamisferli með því að hafa staðið að smygli á um hálfu kílói af amfetamíni með flugi frá Amsterdam nú í ágúst síðastliðnum. Fundust 487 grömm af amfetamíni í pakkningu í ferðatösku mannsins og önnur 7 grömm eða svo í buxnavasa hans.

Málið verður tekið fyrir í Héraðsdómi Reykjavíkur nú strax í byrjun desember.