Ökumaður einn reyndi að stinga lögregluna af í nótt en var handtekinn eftir skammvinna eftirför. Hann er grunaður um að hafa verið undir áhrifum fíkniefna, akstur sviptur ökuréttindum og fyrir að hlýða ekki fyrirmælum lögreglunnar.

Í vesturhluta borgarinnar var tilkynnt um innbrot og þjófnað á gististað en þaðan var verkfærum stolið. Maður var handtekinn grunaður um líkamsárás, hótanir, brot á vopnalögum og vörslu fíkniefna. Hann var vistaður í fangageymslu.

Í Hafnarfirði var tilkynnt um líkamsárás og er málið í rannsókn.

Einn var handtekinn vegna gruns um ölvun við akstur og annar var kærður fyrir að aka sviptur ökuréttindum.

Kvartað var undan ungmennum við Egilshöll og ógnandi hegðun þeirra. Þetta hefur verið ítrekað vandamál síðustu daga.

Tilkynnt var um tvö þjófnaðarmál í verslunum á höfuðborgarsvæðinu í gær. Í öðru þeirra komst þjófurinn undan og í hinu hefur lögreglan ákveðinn aðila grunaðan.