Héraðssaksóknari hefur ákært rúmlega fertugan karlmann úr Reykjanesbæ fyrir brennu, að hafa skapað almannahættu og eignatjón og tilraun til fjársvika en í ákæru er manninum gefið að sök að hafa lagt elda að kjötstandi og grilli á veitingastað í hans eigu.

Þann 21. janúar á síðasta ári var slökkviliðið kallað til að Hafnargötu 32 í Reykjanesbæ. „Talið er næsta víst að eldurinn hafi kviknað út frá eldamennsku og þá líklega djúpsteikingu en lögregla rannsakar nú vettvang,“ sagði í frétt Fréttablaðsins um málið. Rúma klukkustund tók að slökkva eldinn, og tók maðurinn sjálfur þátt í því starfi. Svo fór að endingu að eigandinn var fluttur á sjúkrahús vegna gruns um reykeitrun.

Í ákæru héraðssaksóknara er maðurinn sagður hafa hellt eldhvetjandi efni á svæðin þar sem eldurinn kom upp, „á tveimur aðskildum stöðum í húsnæðinu.“ Annars vegar undir hillu undir hitabökkum hjá afgreiðsluborði og hins vegar undir borði við kjötstand og grill kebabstaðarins.

„Með athæfi sínu olli ákærði eldsvoða sem hafði í för með sér almannahættu og yfirgripsmikið eignatjón á húsnæði veitingastaðarins, en slökkvilið réð niðurlögum eldsins,“ segir í ákærunni.

Þá er maðurinn ákærður fyrir tilraun til fjársvika með því að hafa á fundi með fulltrúum tryggingafélagsins Sjóvá-Almennar haft uppi kröfur um greiðslu bóta vegna tjóns sem hlaust af brunanum sem hann átti ekki rétt á. Segir í ákærunni að Sjóvá hafi hafnað greiðslu bótanna, og vísað til þess að um íkveikju hafi verið að ræða.

Þingfesting málsins er á dagskrá Héraðsdóms Reykjaness þann 16. nóvember.