Það er ný Covid-19-bylgja hafin að sögn Þórólfs Guðnasonar sóttvarnalæknis. Hann ræðir þetta við Fréttablaðið. Í gær greindust 38 smit innanlands og er það mesti fjöldi smita á þessu ári.

Flestir sem eru smitaðir eru bólusettir segir Þórólfur og enginn glímir við alvarleg veikindi. Flestir þeirra sem eru að greinast eru á aldrinum 20-40 ára en að sögn Þórólfs þolir sá aldurshópur sjúkdóminn betur.

Hann segir við Fréttablaðið að hann sé að hugsa um hertari aðgerðir en að hann sé ekki kominn með neitt minnisblað til að leggja fram til heilbrigðisráðherra.

Í samtali við Vísi segir Þórólfur að mikið af smitunum sem eru að greinast séu úti á landi þar sem fólk er að ferðast. Hann segir það vera áhyggjuefni hversu seint fólk er að fara í sýnatöku.