Skömmu fyrir klukkan 3 í nótt reyndi ökumaður á númerslausri bifreið að stinga lögregluna af á Vesturlandsvegi. Hann sinnti stöðvunarmerkjum lögreglunnar ekki. Eftirförin stóð ekki lengi yfir en þegar akstur bifreiðarinnar var stöðvaður fór ökumaðurinn yfir í aftursætið. Hann og kona, sem var í bifreiðinni, voru handtekin en þau eru bæði grunuð um að hafa ekið undir áhrifum fíkniefna og svipt ökuréttindum. Þau voru vistuð í fangageymslu.

Á sjöunda tímanum í gær valt bíll á Krýsuvíkurvegi. Tveir voru í bifreiðinni og komust út af sjálfsdáðum. Ekki liggja fyrir upplýsingar um áverka en sjúkrabifreið var send á vettvang. Mikil hálka var á veginum og var Vegagerðinni gert viðvart.