Kári Stefánsson, forstjóri Íslenskrar erfðagreiningar, segir að ríkisstjórnin hljóti að grípa til mjög harðra sóttvarnatakmarkana í dag. „Stjórnvöld hljóta að skella í lás í dag,“ segir Kári í viðtali við RÚV.
Kári segir að réttast hefði verið að skella í lás á mánudaginn þegar vísbendingar bárust umað breska afbrigðið væri farið að smitast í samfélaginu. Kári segir:
„Ef við gerum þetta myndarlega strax þá getum við komist fyrir þetta á skömmum tíma. Við höfum hreyft okkur aðeins of hægt og það hefði verið skynsamlegt að gera þetta strax á mánudag en stjórnvöld gera þetta vonandi í dag og þá eigum við smá séns.“
Kári segir að breska afbrigðið kalli á allsherjar endurskoðun á sóttvarnamálum. Rétt er að taka fram að hann viðhafði þessi ummæli áður en hann vissi hvað margir voru í sóttkví, en aðeins þrír greindust utan sóttkvíar í gær.
