Á níunda tímanum í gærkvöldi var lögreglunni tilkynnt að ekið hefði verið í veg fyrir bifhjól í austurborginni. Ekki liggja fyrir upplýsingar um meiðsl. Á sjöunda tímanum í gær var tilkynnt um innbrot í bílskúr í vesturborginni og að munum hafi verið stolið. Málið er í rannsókn. Klukkan 20.00 var ekið á vegrið í vesturborginni. Ökumaðurinn var handtekinn því hann er grunaður um að hafa verið undir áhrifum fíkniefna.
Fimm ökumenn til viðbótar voru handteknir í gærkvöldi og nótt grunaðir um að vera undir áhrifum áfengis og/eða fíkniefna.
Skömmu eftir miðnætti aðstoðuðu lögreglumenn ofurölvi mann við að finna íbúð sína en hann hafði ruglast á fjölbýlishúsum í austurborginni og farið inn í eitt sem líkist húsinu sem hann býr í.
