Miðað við tölur Veðurstofunnar þá hafa alls 2427 skjálftar riðið yfir landið seinustu 48 tímana. 49 af þessum skjálftum mældust yfir þrjá að stærð.

Stærsti skjálftinn reið yfir korter yfir þrjú í nótt en hann mældist 5,1 að stærð og er sá stærsti í nokkra daga. Síðasti skjálfti yfir fjóra mældist 4,6 og var það klukkan ellefu mínútur í níu í morgun.

Virknin, líkt og í gær, er að mestu bundin við suðurhluta Fagradalsfjalls en nokkrir skjálftar mældust rétt norðaustur af Grindavík í nótt, sá stærri 3,9 kl. 04:35 og við örfáir við Trölladyngju. Enginn gosórói hefur mælst, né afgerandi breytingar í GPS gögnum.

Freysteinn Eysteinsson, jarðeðlisfræðingur, ræddi við fréttastofu RÚV í gær og segir hann að gos gæti hafist á Reykjanesskaga með skömmum fyrirvara. Kvikugangurinn sem hefur myndast á milli Fagradalsfjalls og Keilis gæti enn lengst og mesta virknin er nú við suðurenda hans. Kvika streymi jafnt og þétt inn í ganginn á milli Keilis og Fagradalsfjalls.