Enn hefur ekkert heyrst í fjallgöngumanninum John Snorra Sigurjónssyni en hann er þessa stundina staddur á fjallinu K2 ásamt öðrum fjallgöngumönnum. Hafa margir áhyggjur af John Snorra og hinum fjallgöngumönnunum þar sem ekki hefur heyrst til þeirra í þó nokkurn tíma. Herinn í Pakistan sendi til að mynda þyrlur upp á fjallið til að leita að þeim en leitin bar ekki árangur.
„Við bíðum frétta á John Snorra vini mínum. John og Lína konan hans eru eitthvað magnaðasta fólk sem ég hef kynnst,“ segir almannatengillinn og tónlistarmaðurinn Einar Bárðarson í færslu sem hann birti á Facebook-síðu sinni í dag. Einar gaf DV góðfúslegt leyfi til að fjalla um færsluna.
Einar segir að ekki allir skilji verkefnið sem John tók sér fyrir hendur, það er að klífa K2. „Hann er einn reyndasti fjallamaður heims. Honum datt þetta ekki í hug í fyrra vetur í einhverri miðaldrakrísu. Hann hefur farið á flesta toppa heimsins og suma oft. Hann hefur klifið fjallið að sumri og þá tók hann krók á leiðinni niður og smellti sér á K3 Eða K5 bara svona af því að það var þarna rétt fyrir framan hann,“ segir Einar.
Þá bendir Einar á að John hefur mikla reynslu af því að vera í himinloftunum á K2. „Hann var þarna efst uppi allan janúar í fyrra og kom niður án þess að ná á toppinn vegna þess að hann er skynsamur, þrátt fyrir allt. Hann er búinn að vera þarna uppi frá því í desember. Það er ekkert þarna að koma honum á óvart. Hann er búinn að vera í -20/40 gráðum vikum saman í allskonar veðri og sleppa við snjóhrun og ýmsar hættur. Pakistanski herinn fær greitt fyrir það að vera í viðbragðsstöðu í tilfellum eins og þessum. Það er greitt af fjallamönnum eins og honum. Það greiða þeir í formi leyfisbréfa til ferða eins og þessarar.“
Að lokum segir Einar að hann biðji fyrir því að John og félagar hans komist heilir á húfi niður af fjallinu. „Á sama tíma og ég skrifa þetta er ég á bæn um það að vinur minn og félagar hans kom heilir niður og helst með toppinn á K2 í vasanum. Sendum honum góða strauma. Hann er líklega sá maður í heiminum sem er líklegastur til að koma niður eftir tveggja nátta stopp í turnsvítu. Guð fylgi þér heim vinur.“
Lesa meira Ekki heyrst frá John Snorra í 37 klukkutíma – Uppfært
