COVID-19 smit á Íslandi eru núna í lágmarki en helsta hættan á því að faraldurinn blossi upp aftur liggur í landamærasmitum og framferði sumra sem koma inn í landið. Dæmi eru um að fólk sem hingað kemur gefi upp rangt símanúmer og rangt heimilisfang. Því geti verið erfitt að ná í það ef sýnataka á landamærum skilar jákvæðri niðurstöðu. Þetta kom fram á upplýsingafundi dagsins. Þórólfur Guðnason sóttvarnalæknir segist vera að skoða núna hvernig best sé að koma í veg fyrir að veiran komist inn í landið.
Ísland er COVID-smitlaust annan daginn í röð. Aðeins tvö innanlandssmit hafa greinst síðustu viku og þar af var annar í sóttkví. Eitt smit greindist á landamærum í gær en ferðum til landsins hefur fækkað mikið undanfarið.
Ótti ríkir gagnvart nýjum meira smitandi afbrigðum veirunnar. Hingað til hafa 60 greinst með breska afbrigðið á landamærum, þar af 14 innanlands en þeir voru allir í tengslum við þá sem smituðust á landamærum. Að sögn Þórólfs hefur engin dreifing orðið á bresku veirunni í samfélaginu og enginn hefur greinst með s-afríska og brasilíska afbrigðið.
Bóluefni frá AstraZeneca fyrir 32.000 manns er væntanlegt fyrir lok mars. Verður það notað fyrir fólk 65 ára og yngri. Viðræður hafa verið við bóluefnaframleiðandann Pfizer um vísindatilraun sem myndi fela í sér bólusetningu allrar þjóðarinnar á skömmum tíma. Enginn samningur er á borðinu en svara er að vænta frá Pfizer næstu daga.
Þórólfur mun leggja til vægar tilslakanir á samkomutakmörkunum öðru hvoru megin við helgi. Hann er ekki tilbúinn að greina frá innihalda þeirra tillagna að svo stöddu.
