Halla Fróðadóttir, formaður Félags íslenskra lýtalækna, hefur sérhæft sig í uppbyggingu brjósta eftir brjóstnámsaðgerðir. Hún er mikil dreifbýlisgella og heldur bæði hesta og hænur.

Halla er í forsíðuviðtali í nýjasta helgarblaði DV. Hér er brot úr viðtalinu.

Nokkuð hefur verið fjallað um hið svokallaða brakkagen, BRCA-gen. Meinvaldandi breytingar í bæði BRCA1 og BRCA2 auka hættu á nokkrum krabbameinum, meðal annars brjóstakrabbameini. Margar þeirra kvenna sem vita að þær eru með þessa stökkbreytingu kjósa að fara í áhættuminnkandi brjóstnám.

„Þetta eru frískar konur en í mörgum tilvikum eru mjög miklar líkur á að þær fái brjóstakrabbamein. Þær standa því frammi fyrir þeirri ákvörðun að láta fjarlægja á sér brjóstin eða vera í reglulegu eftirliti með myndrannsóknum. Meirihluti kvenna velur að fara í brjóstauppbyggingu samhliða brjóstnáminu en þó ekki allar konur.

Þetta er stór ákvörðun og getur haft mikil áhrif á lífsgæði kvenna. Það geta verið aukin lífsgæði fyrir konu að velja áhættuminnkandi brjóstnám en það er ekki sjálfgefið að allt gangi að óskum. Fylgikvillar aðgerða geta haft áhrif á útkomuna og geta þarfnast endurtekinna aðgerða. Þetta hefur óhjákvæmilega áhrif á lífsgæði þessara kvenna. Við getum líka verið með konu sem fer í vel heppnaða aðgerð en henni líður samt ekki nógu vel með þetta. Það getur verið erfitt að venjast tilfinningunni í brjóstunum eftir aðgerð.

Þær konur sem fara í áhættuminnkandi brjóstnám eru yfirleitt á aldrinum 35-50 ára. Bakgrunnur þessara kvenna er mismunandi og þær geta verið með alls konar áfallasögu á bakinu sem hefur áhrif á upplifun þeirra. Sumar þessara kvenna hafa átt mömmu eða systur sem hefur látist úr krabbameini. Það er að mörgu að huga.“

Sjúkratryggingar taka þátt í að niðurgreiða áhættuminnkandi aðgerðir sem og brjóstaaðgerðir í kjölfar krabbameins. Þegar kemur að því sem kallast hreinar fegrunaraðgerðir greiðir fólk hins vegar sjálft fyrir aðgerðina.

Viðtalið má lesa í heild sinni í nýjasta helgarblaði DV.

Einfalt er að gerast áskrifandi að vef- og/eða prentútgáfu blaðsins með því að smella hér: dv.is/skráning