Um fimm-leytið í gær var tilkynnt um umferðarslys í hverfi 110 í Reykjavík. Bíl með kerru var ekið framhjá manni með þeim afleiðingum að kerran rakst utan í manninn og hann féll við. Ökumaðurinn hélt áfram en stoppaði við hús þar nærri. Aðspurður kvaðst ökumaðurinn hafa ekið hægt framhjá manninum en sá ekki er kerran rakst í hann. Sjúkrabíll kom á vettvang en maðurinn var staðinn upp er lögregla kom.
Þetta kemur fram í Dagbók lögreglu en ekkert var skráð um meiðsli mannsins. Einnig segir af þessu:
Um hálfsjöleytið í gærkvöld var tilkynnt innbrot í bíl í hverfi 105. Var brotin rúða á bílnum og stolið tveimur svörtum 66°N úlpum.
Þrisvar í gærkvöld var tilkynnt um þjófnað úr sömu verslun í miðbænum. Má leiða að því líkur að um hafi verið að ræða 10/11 í Austurstræti enda síðasta tilvikið skráð laust eftir kl. 23 í gærkvöld og vart öðrum verslunum opnum á svæðinu til að dreifa á þeim tíma. Voru aðilar að stela vörum, eins og það er orðað í dagbókinni. Var skrifuð vettvangsskýrsla á hvert brot.
