Póstdreifing sem er í eigu Árvakurs, útgefanda Morgunblaðsins, og Torgs, sem gefur út Fréttablaðið og DV, hefur sagt upp öllum 304 blaðberum sínum. RÚV greindi fyrst frá þessu í morgun.
Auk áðurnefndra blaða sér Póstdreifing einnig um dreifingu á ýmsum minni blöðum og auglýsingabæklingum. Uppsagnirnar taka til blaðbera á höfuðborgarsvæðinu og Akureyri. Þær taka gildi 1. ágúst en flestir blaðberanna eru með þriggja mánaða uppsagnarfrest.
Kristín Björk Einarsdóttir, framkvæmdastjóri Póstdreifingar, segir að á þessum tímapunkti sé nauðsynlegt að endurskipuleggja dreifikerfið og stefnt sé að því að ráða flesta blaðberana aftur.
Spurð hvort það sé ekki ávísun á meira álag ef færra starfsfólk sinnir sömu vinnu og fleiri gerðu áður segir hún það alls ekki víst. „Það þarf ekki að vera þannig. Það hefur mikið breyst á undanförnum árum í útgáfu blaðanna og því þarf að mæta með hagræðingaraðgerðum,“ segir Kristín en vill ekki gefa upp hversu mörgum af þeim sem sagt var upp sé reiknað með að ráða aftur.
Hvað launakjör blaðbera sem verða endurráðnir segir Kristín: „Það verða sömu laun en lægra starfshlutfall þannig að þeir þurfa að vinna minna.“ Hún tilkynnir þá blaðamanni að hún þurfi að fara á fund og geti ekki svarað fleiri spurningum í bili.
Jóhanna Helga Viðarsdóttir, forstjóri Torgs, segir: „Við búumst ekki við því að hagræðingaraðgerðir Póstdreifingarinnar muni raska dreifingu þeirra blaða sem Torg gefur út.“
Tekið skal fram að Torg, útgefandi DV, á 49% hlut í Póstdreifingu.