Kjörstaðir opna kl 9:00 í fyrramálið um allt land þegar kosið verður á milli Guðna Th. Jóhannessonar og Guðmundar Franklíns Jónssonar til forseta Íslands. Um 47 þúsund manns höfðu þegar kosið utankjörfundar í dag og er það ívið meira en áður. Hafa bæði framboðin hvatt sína stuðningsmenn til að drífa í að kjósa. Líklega er þar ótti á ferð við að missa kjósendur úr bænum á kjördag enda hásumar og fólk hvatt til að nýta helgar í að ferðast innanlands. Búist er við fyrstu tölum frá einstaka kjörstöðum fljótlega eftir lokun kjörstaða. Guðni hefur mælst með 93% stuðnings í skoðanakönnunum Gallup síðustu vikuna.
Kosið er nú um forseta Íslands í níunda sinn frá lýðveldisstofnun. Forseti hefur jafn oft verið sjálfkjörinn til embættis og kosið hefur verið um embættið. Að meðaltali hefur verið kosið um forseta á 8.4 ára fresti frá lýðveldisstofnun.
Fyrsti forseti lýðveldisins, Sveinn Björnsson, var kjörinn af Alþingi á Þingvöllum árið 1944. Sveinn fékk engin mótframboð í kosningunum 1948 og því sjálfkjörinn. Sveinn var þannig aldrei kosinn beinni kosningu af þjóðinni.
Árið 1952 var kosið á milli þriggja frambjóðenda og varð Ásgeir Ásgeirsson annar forseti Íslands. Sat hann fjögur kjörtímabil án þess að fá nokkru sinni mótframboð. Var hann því sjálfkjörinn í síðustu þrjú kjörtímabilin sín.
Árið 1968 var svo kosið á ný til forseta eftir að Ásgeir gaf ekki kost á sér að nýju. Sigraði þá Kristján Eldjárn hann Gunnar Thoroddssen með 65,6% atkvæða.
Kristján sat sem fastast, án mótframboða, til ársins 1988 þegar Vigdís Finnbogadóttir sigraði með naumum meirihluta. Aðeins munaði um 1900 atkvæðum á henni og Guðlaugi Þorvaldssyni sem næstur kom. Aðrir frambjóðendur voru Albert Guðmundsson, hvíta perlan, og Pétur J Thorsteinsson.
Vigdís hlaut ekki mótframboð 1984 en 1988 gerðist það í fyrsta sinn í lýðveldissögunni að sitjandi forseti fékk á sig mótframboð. Sigrún Þorsteinsdóttir hlaut þá 5,3% og Vigdís 92,7%. Hafa margir bent á líkindi þeirra kosninga og kosninganna nú.
Næst var kosið 1996 þar sem Ólafur Ragnar bar sigur úr býtum. Sat Ólafur án mótframboðs í 8 ár, en árið 2004 buðu þeir Baldur Ágústsson og Ástþór Magnússon sig fram. Ólafur sigraði með 67,5% greiddra atkvæða. Auðir seðlar voru 20,6% sem þótti og þykir enn, mjög mikið.
Talsvert fleiri buðu sig fram á móti Ólafi Ragnari árið 2012, en næst því að hrinda Ólafi úr sessi komst Þóra Ásgeirsdóttir með 33,16% atkvæða. Ólafur sigraði örugglega með 52,78% og sat í fjögur ár í viðbót.
Guðni Th. Jóhannesson sigraði svo kosningarnar 2016 með 39,1% atkvæða. Næst á eftir honum kom Halla Tómasdóttir með 27,9%. Halla hafði bara skömmu áður verið að mælast með um 5-10% fylgi, svo niðurstöður kosninganna voru á skjön við flestar skoðanakannanir fram að kjördegi. Hafði Guðni sjálfur orð á því þegar fyrstu tölur voru kynntar í kosningasjónvarpi RUV, að hann hafi ekki talið að þetta gæti farið svo jafnt.
