Innkalla þurfti gleraugu frá þekktum framleiðendum eftir að of hátt nikkelinnihald mældist í ákveðnum gleraugnaumgjörðum í öryggiskönnun í Finnlandi. Gleraugun sem um ræðir eru frá vörumerkjunum Guess, Burberry, Calvin Klein, Disney, Bvlgari, DAY Birger et Mikkelsen, Ivana Helsinki og Ray Ban. Til stendur að innkalla umgjarðirnar víðar í Evrópu.
Nikkel getur valdið ofnæmisviðbrögðum ef það kemst í snertingu við húð. Ekki fékkst staðfest hvort að gleraugun séu seld hér á landi en samkvæmt fyrirspurnum DV könnuðust þeir gleraugnasalar sem hringt var í ekki við málið að svo stöddu og sögðust ætla að kynna sér það. Ekki þykir þó ólíklegt að þessar umgjarðir séu í umferð hérlendis þar sem þessi vörumerki fást víða í gleraugnaverslunum á Íslandi.
Samkvæmt Ísaki Sigurjóni Bragasyni, sérfræðingi hjá Umhverfisstofnun, hafa þau fengið tilkynningu um málið og eru með það í skoðun.