Nokkur umferðaróhöpp hafa orðið í umdæmi lögreglunnar á Suðurnesjum á síðustu dögum. Flutningabíll valt á Reykjanesbraut í fyrradag þegar vindhviða skall á honum. Í skeyti sem lögreglan á Suðurnesjum sendi frá sér kemur fram að sjúkraflutningamenn hafi aðstoðað ökumanninn við að komast út um framrúðu bifreiðarinnar. Hann fann til verkja eftir óhappið.
Enn fremur óku tveir ökumenn út af á Reykjanesbraut. Einn til viðbótar var að búa sig undir að aka inn í hringtorg og var þá ekið aftan á bifreið hans. Fleiri óhöpp urðu en þau voru smávægileg og engin slys urðu á fólki.
Þá voru nokkrir kærðir fyrir hraðakstur. Sá sem hraðast ók mældist á 130 kílómetra hraða á Reykjanesbraut þar sem hámarkshraði er 90 kílómetrar á klukkustund. Samkvæmt sektarreikni lögreglunnar getur sá hinn sami átt von á 120 þúsund króna sekt.