Veðurstofa Íslands á von á því að illviðrið sem nú geysar víða á landinu gangi niður eftir hádegi og á miðnætti renni síðasta gula viðvörunin úr gildi. Það er þó skammt stórra högga á milli því á morgun nálgast næsta lægð sem er einnig býsna djúp en áhrif hennar verða þó að líkindum minni hér á landi.
„Hún er raunar enn dýpri en lægð dagsins í dag. Lægðin í dag ýtir hinsvegar hæðinni yfir Grænlandi lengra til norðurs og verður þrýstibrattinn yfir landinu, og þar með vindstyrkur, ekki jafnmikill og í dag. Reiknað er með að gefa út viðvaranir vegna lægðarinnar á morgun síðdegis í dag, þegar að núverandi veður byrjar að ganga niður,“ segir í hugleiðingum veðurfræðings á vef Veðurstofu Íslands.
Mestur vindur, enn sem komið er, hefur mælst á Þyrli í Hvalfirði, 40 metrar á sekúndu, og á Stórhöfða í Vestmannaeyjum, 45 metrar á sekúndu. Þar hefur einnig verið úrkomumest.
„Veðrið heldur áfram að versna og nær bráðlega hámarki sunnantil á landinu, en með morgninum heldur áfram að hvessa nyrðra. Rauðar eða appelsínugular viðvaranir eru í gildi í öllum landshlutum. Fjöldi eldinga hafa mælst handan skilana, og á Suðausturlandi eru líkur á að það verði vart við eldingar þegar að skilin ganga yfir.“