Á miðnætti tekur gildi ný reglugerð heilbrigðisráðuneytisins um samkomutakmarkanir vegna COVID-19. Þá verður starfsemi hárgreiðslustofa, nuddstofa, sólbaðsstofa, snyrtistofa og sambærilegra aðila leyfileg á ný. Líkamsræktarstöðvar og sundlaugar verða áfram lokaðar.

Nokkrar sólbaðsstofur verða með miðnæturopnun vegna þessa. Þetta kemur fram í frétt á vef Fréttablaðsins. Sólbaðsstofan Stjörnusól í Hafnarfirði og Kópavogi verður með miðnæturopnun og er nú þegar fullbókað á stofunni til klukkan hálf fjögur í nótt. Sólbaðsstofan Sælan í Kópavogi opnar einnig á miðnætti en opið verður til sex í fyrramálið. Grímuskylda er á stofunum og tíu manna fjöldatakmörkun.

Biðlistar eru á flestum hárgreiðslustofum og þeir sem áttu bókaða tíma á því tímabili þegar lokað var ganga fyrir. Þurfa þó margir þeirra að bíða töluvert lengi eftir klippingu. Íþróttastarf barna og unglinga verður einnig leyfilegt á ný frá og með miðnætti en lesa má um tilslakanirnar sem taka gildi frá og með 18. nóvember á vef Stjórnarráðs Íslands.