Líkamsræktarstöðin World Class hefur tilkynnt að starfsemi muni hefjast í stöðvum aftur frá og með deginum í dag en um helgina voru tilkynntar breytingar á reglum um sóttvarnartakmarkanir sem fólu í sér að heilsurækt mætti fara af stað aftur með skipulagða hópatíma ef einstaklingar eru skráðir í tíma og reglum um fjarlægð og þess háttar væri gætt. Hins vegar er óheimilt að vera með æfingar í skipulögðu íþróttastarfi sem og æskulýðs- og tómstundastarf barna.
World class hefur sett 19 manna hámark í alla tíma, gætt að tveggja metra reglu, búnaður sótthreinsaður milli tíma og hver tími hefur sérinngang og salernisaðstöðu.
Eins verður lokað fyrir búningsklefa og sturtu.
Á upplýsingafundi almannavarna í dag sagði Þórólfur Guðnason, sóttvarnarlæknir, að mikið af smitum í síðari bylgju COVID-19 mætti rekja til líkamsræktar og íþróttaiðkunar og hefði hann helst viljað skrúfa fyrir slíka starfsemi áfram.
Stjórnvöld hafi þó orðað reglurnar með þeim hætti að heilsurækt mætti fara að stað aftur með skipulagða tíma sem skráð er í. Hins vegar ætlaði Þórólfur að ræða um þetta orðalag við stjórnvöld og skýra betur út reglurnar en margir staðir sem bjóða upp á heilsurækt eru nú óvissir um hvert inntak reglnanna sé og hvaða starfsemi falli innan þeirra og hvaða starfsemi falli utan.