Hinn landsþekkti blaðamaður, Eiríkur Jónsson, er með COVID-19. Eiríkur sem lengi hefur verið sagður vera „blaðamaður án hliðstæðu“ greinir frá þessu á fréttavef sínum eirikurjonsson.is.
Segist hann hafa vaknað kófsveittur og kaldur með dynjandi höfuðverk, mikinn hita og gat í hvorugan fótinn stigið. Vissi Eiríkur, sem upplifði einnig mjög skert jafnvægisskyn, samstundis að hann væri með veiruna alræmdu.
„Svaf allan laugardaginn í rennandi blautum rúmfötum og hitastig líkamans virtist sveiflast frá frosti í funa. Missti þó aldrei andann. Braggaðist um kvöldið og var kominn í sýnatöku í hádeginu á sunnudag þar sem grunur minn var staðfestur,“ segir Eiríkur á vef sínum.
Hann veit hins vegar ekki hvaða smitið kom en telur líklegast að hann hafi smitast í Breiðholtslauginni. Hann segist ekkki hafa heilsað neinum með handabandi síðan í mars, hafa þvegið sér um hendur á kortersfresti og virt fjarlægðarmörk í hvívetna.