Lögreglan á Suðurlandi var kölluð á þorrablót í sveitarfélaginu Hornafirði vegna æsts gests. Í skeyti frá lögreglu um verkefni liðinnar viku kemur fram að gesturinn hafi meðal annars bitið mann sem var við dyravörslu á staðnum. Maðurinn er sagður hafa róast í höndum lögreglumanna og fékk hann aðstoð við að komast heim til sín.
Lögregla hefur verið við umferðareftirlit við þau fjölmörgu þorrablót sem hafa verið í umdæminu. Margir ökumenn hafa verið látnir blása og enn sem komið er hefur enginn reynst vera undir áhrifum áfengis.
Einn ölvaður ökumaður var þó stöðvaður á Selfossi að kvöldi fimmtudagsins. Sá var frjáls ferða sinna eftir blóðsýnatöku og bíður mál hans nú niðurstöðu þeirrar rannsóknar.
21 ökumaður var kærður fyrir að aka of hratt í liðinni viku. Rúmlega helmingur þeirra á svæðinu í kring um Vík og Kirkjubæjarklaustur og 3 þessara ökumanna voru á 130 km/klst hraða eða meira á 90 km/klst vegi.
14 umferðarslys voru tilkynnt til lögreglu í umdæminu í vikunni. Öll án alvarlega meiðsla.Í þremur tilvikum var um að ræða fólksflutningabíla og í þeim 17, 21 og 45 farþegar. Þeim málum hefur öllum verið gerð skil í umræðu fjölmiðla. Lögregla hvetur alla til þess að nota öryggisbelti því þau virðast vera það sem skiptir öllu máli í að lágmarka meiðsl þegar slysin verða. Skynsamlegt er að ökumenn fólksflutningabíla hvetji farþega sína til þess að nota belti og kynni erlendum gestum okkar skyldu til þess.